ઓછામાં ઓછું એક ફિલ્મ પ્રોડકશન હાઉસ અને એક ક્રિકેટ લીગે ત્રાસવાદી હુમલાને કારણે કાર્યક્રમો રદ કરવા પડયા તે બદલે ઇન્શૂરન્સ માટેના દાવા નોંધાવ્યા છે. જાણવા મળ્યા મુજબ અન્ય અનેક ફિલ્મ નિર્માતાઓ આ જ પ્રકારનો વીમો લેવાનું વિચારી રહ્યા છે. હુમલાને કારણે શો રદ કરાતાં તથા સિનેમાગૃહો બંધ કરાતાં બોલીવૂડને ભારે નાણાકીય નુકસાન થયું હતું. આવા અવરોધો સામેનો વીમો લેનારાઓમાં 'દોસ્તાના'ના નિર્માતા ધર્મા પ્રોડકશન્સનો સમાવેશ થાય છે. તેમણે રૃા. ૨૦ કરોડથી રૃા. ૨૫ કરોડ સુધીનું ઇન્શૂરન્સ કવર (વીમા કવચ) મેળવ્યું છે. હુમલાને કારણે આઈસીએલએ પણ ત્રણ મેચ રદ કરવી પડી હતી. વર્તુળોએ જણાવ્યું હતું કે ભારતીય, પાકિસ્તાની અને બાંગલાદેશી ખેલાડીઓ અમદાવાદમાં રમી રહ્યા હોવાથી પરિસ્થિતિ સંવેદનશીલ હતી. મેચનું ટીવી પ્રસારણ ન કરાય તો જાહેરખબરની આવકનું નુકસાન થાય તે સામે આઈસીએલએ વીમા રક્ષણ મેળવ્યું છે, પણ વીમા કવચની રકમ જણાવાઈ ન હતી.